Zähmete sarpanyň dabaralanmasy

Golaýda Daşoguz welaýat häkimliginiň mejlisler zalynda hormatly Prezidentimiziň gol çeken Permanydyr Kararyna laýyklykda, welaýat, şäher, etrap häkimlikleriniň ýolbaşçylaryna we jogapkär işgärlerine «Magtymguly Pyragynyň 300 ýyllygyna» atly ýubileý medalynyň hem-de ýadygärlik nyşanynyň gowşurylyş dabarasy boldy. Dabara welaýat, etrap häkimlikleriniň jogapkär işgärleri, edara-kärhanalaryň, jemgyýetçilik guramalaryň ýolbaşçylary, dürli ugurlarda zähmet çekýän adamlar hem-de ýaşuly nesliň wekilleri, ýaşlar gatnaşdylar.

Dabaranyň dowamynda çykyşlar guralyp, baýramçylyk mynasybetli ýürek arzuwlary beýan edildi. Soňra döwlet sylagyna mynasyp bolan adamlara sylaglaryň gowşurylyşy boldy. Toýly günlerde döwlet sylagyna mynasyp bolan bagtyýar adamlar halkymyza egsilmez bagt eçilýän, raýatlarymyzyň bagtyýar durmuşda ýaşamaklaryny üpjün etmekde ýadawsyz aladalar edýän türkmen halkynyň Milli Lideri Gahryman Arkadagymyza we Arkadagly Gahryman Serdarymyza ýürekden alkyş sözlerini aýtdylar.

Dabaranyň dowamy welaýatyň medeniýet we sungat işgärleriniň aýdym-sazly çykyşlaryna utgaşdy. Belentden ýaňlanan hoş owazly nagmalarda parahat ýaşaýşyň, gülläp ösüşleriň, halkymyzyň agzybirliginiň, ýurdumyzda amala aşyrylýan belent tutumlarynyň waspy ýetirildi.