Ýol hereketiniň howpsuzlygy — ömrümiziň rahatlygy

Ýol-ulag hadysalarynyň öňüni almak, ilata ýollarda özüňi howpsuz alyp barmagyň düzgünlerini düşündirmek, ýol hereketiniň howpsuzlyk düzgünlerini dogry berjaý etmekligi wagyz etmek we bu ugurda ekologiýa howpsuzlygynyň talaplaryny berjaý etmek boýunça polisiýanyň ýol gözegçiligi bölümçeleri tarapyndan zerur çäreler durmuşa geçirilýär.

Mekdebe çenli çagalar edaralarynda, umumybilim berýän we orta hünär okuw mekdeplerinde awtomobil ýollarynda özüňi howpsuz alyp barmagyň düzgünleri boýunça gysga möhletli okuwlar, wagyz-nesihat çäreleri, bäsleşikler geçirilýär. Bu çäreler Türkmenistanyň kadalaşdyryjy hukuk namalarynda bellenilen tertipde işlenip düzülen maksatnamalara we usulyýet maslahatlaryna laýyklykda amala aşyrylýar.

Ýol hereketiniň howpsuzlygyny üpjün etmekde her ýylyň sentýabr aýynda badalga berilýän «Ýol hereketiniň howpsuzlygy — ömrümiziň rahatlygy» atly biraýlygyň ähmiýeti örän uludyr. Bu giň gerimli çäre raýatlarda ýol hereketiniň howpsuzlygy babatdaky şahsy we jemgyýetçilik jogapkärçiligini oýarýar. Çünki ýol hereketiniň howpsuzlyk düzgünlerini her bir adamyň berjaý etmegi wajypdyr.