«Ýol hereketiniň howpsuzlygy — ömrümiziň rahatlygy»

Abadan durmuşyň kepili

Garaşsyz, baky Bitarap ýurdumyzda her ýylyň sentýabr aýynda «Ýol hereketiniň howpsuzlygy — ömrümiziň rahatlygy» atly biraýlyk üstünlikli geçirilýär. Halkara parahatçylyk we ynanyşmak ýylynda hem bu möhüm çäräniň guramaçylykly amala aşyrylmagyna hemmetaraplaýyn taýýarlyk görlüp, şu aýyň başyndan oňa badalga berildi.

Biraýlygyň esasy maksady döwlet hem-de şahsy ulaglaryň gatnaşmagynda, ýollarda gatnawlaryň ýol hereketiniň düzgünlerine laýyklykda howpsuz hereketini üpjün etmekden, ynsan ömri, saglygy üçin howply bolan ýol-ulag hadysalarynyň öňüni almakdan, ýol hereketine gatnaşýan sürüjileriň, pyýadalaryň hüşgärligini, seresaplylygyny ýokarlandyrmakdan, ýol hereketiniň düzgünlerini pugta berjaý etmeklige olaryň ünsüni çekmekden ybaratdyr. Şoňa görä-de, şu aýyň dowamynda degişli edaralaryň, gulluklaryň işgärleriniň, jemgyýetçilik guramalarynyň wekilleriniň edara-kärhanalarda, okuw jaýlarynda, orta mekdeplerde, çagalar baglarynda we beýleki ýerlerde yzygiderli bolup, degişli ugur boýunça düşündiriş, wagyz-nesihat işlerini alyp barmaklaryna aýratyn üns berilýär.

Elbetde, ýol hereketiniň howpsuzlygynyň biraýlygynyň ýokary derejede geçirilmeginiň oňat netijeleri berýändigini geçen ýyllaryň tejribeleri aýdyň görkezýär. Şonuň üçin-de onuň barşynda, ondan soňraky döwürde hem bu babatda öňde goýulýan wezipeleriň pugta berjaý edilmeginiň uly ähmiýeti bardyr. Çünki hemmämize mälim bolşy ýaly, ýol-ulag hadysalarynyň ýüze çykmagynyň her bir maşgala öwezini hiç bir zat bilen dolup bolmajak ýitgileri getirmegi, ynsanyň saglygyna uly zeper ýetirmegi ahmaldyr. Şeýle bolansoň, ulag sürüjileriň, pyýadalaryň ýola çykmazdan öň, bu hakda oýlanmaklary, ýollarda örän seresaply hereket etmekleri zerur bolup durýar.

Halkymyzyň ýaşaýyş derejesi barha ýokarlanýar. Şeýle ajaýyp döwürde her bir maşgalanyň abadan, asuda durmuşda ýaşamagy üçin ähli zerur şertler döredilýär. Bu babatda  geçirilýän şu biraýlyk hem örän uly ähmiýete eýe bolup durýar. Şonuň üçin hem oňa hemmeleriň işjeň gatnaşmaklary möhümdir. Ýollarymyz ak bolsun!