Ýol abat — il abat

Islendik ynsan ýola çykanda, ilki bilen, maşgalasyna, çagalarynyň arasyna sag-aman dolanyp gelmegi arzuw edýär. Emma şonda sürüjiniň ýa-da pyýadanyň sähelçe ýalňyşlygy, perwaýsyzlygy bilen bu ýagşy niýetiň puja çykmagy-da mümkin. Çünki beýle ýagdaýlaryň ýol-ulag hadysalarynyň ýüze çykmagyna getirip bilýändigi belli.

Elbetde, häzirki dowam edýän biraýlygyň esasy maksady her bir adamyň beýle ýagdaýlara gabat gelmezligini gazanmakdan ybarat. Şonuň üçin hem bu babatda amala aşyrylýan çäreler aýratyn ähmiýete eýe bolmak bilen, biziň her birimiziň olara ýakyndan goldaw bermegimizi talap edýär. Ata-babalarymyz ýola çykan adama «Ýoluň ak bolsun!» diýip ýagşy arzuw edipdirler. Bu däp häzir hem dowam edýär. Goý, hemişe ýollarymyz ak, öýlerimiz abadan bolsun!