Ylym-bilime giň ýol

Berkarar döwletiň täze eýýamynyň Galkynyşy döwründe bilimdir ylmy ösdürmäge giň ýol açylýar. Häzirki döwrüň talabyna laýyk gelýän hünärmenleri taýýarlamakda ýurdumyzyň ýokary we orta hünär okuw mekdepleriniň öňünde wajyp wezipeler goýulýar. Şolaryň oňyn çözülmegi üçin Daşoguzyň Beki Seýtäkow adyndaky mugallymçylyk mekdebinde hem uly aladalar edilýär. Mekdebiň pedagog-mugallymlary multimedia tehnologiýasy bilen enjamlaşdyrylan okuw otaglarynda okatmagyň döwrebap usullaryndan peýdalanýarlar.

Häzirki wagtda bilim ulgamynda geçirilýän özgertmeler özüniň oňyn netijelerini berýär. Muňa mugallymçylyk mekdebiniň okuw işleriniň mysalynda göz ýetirmek bolýar.

Mugallymçylyk mekdebinde nazary bilimler bilen bilelikde, okuw tejribeligi ýokary hilli alnyp barylýar. Nazary sapaklarda berlen bilimlere halypa mugallymlaryň ýolbaşçylygynda tejribede amal edilýär.

Okuw meýilnamalaryny ýerine ýetirmek, talyp ýaşlaryň hünär taýýarlygyny ýokarlandyrmak, olaryň nazary okuwlarda alan bilimlerini önümçilik bilen baglanyşdyryp berkitmek maksady bilen, okuw ýylynyň dowamynda okuw-önümçilik tejribelikleri guralýar. Talyp ýaşlaryň tejribelikleri «Türkmenistanyň ýokary we orta okuw mekdepleriniň talyplarynyň önümçilik-hünär öwreniş tejribeligi hakyndaky» Düzgünnama laýyklykda, Daşoguz welaýatynyň çägindäki orta mekdeplerde we çagalar baglarynda geçirilýär. Ýerine ýetirilen işler esasynda tejribeligiň gündeligi hem-de hasabatlary ýöredilýär.