Ýaş ýangyn söndürijileriň bäsleşigi

Golaýda Daşoguz şäherindäki «Garaşsyzlyk» sport desgasynda «Ýangyn howpsuzlygy hakynda» Türkmenistanyň Kanunyna laýyklykda, ýurdumyzyň mekdep okuwçylarynyň ýaş ýangyn söndüriji toparlarynyň arasynda yglan edilen ýangyn-amaly sport bäsleşiginiň Daşoguz welaýat tapgyry geçirildi.

Bäsleşigiň şertlerine görä, oňa gatnaşyjy toparlaryň agzalary 100 metrlik päsgelçilikli aralyga ylgamak, 4x100 metrlik ýangyn estafetasynyň talaplaryny ýerine ýetirmek boýunça ýaryşdylar hem-de özleriniň erjelliklerini görkezmegi başardylar. Olaryň çykyşlaryna ýörite düzülen eminler topary tarapyndan gözegçilik edildi hem-de degişli bahalar berildi.

Bäsleşigiň ahyrynda emin agzalarynyň gelen netijelerine görä, 1-nji orna Daşoguz şäherindäki daşary ýurt dillerine ýöriteleşdirilen 24-nji, 2-nji orna Akdepe etrabyndaky 33-nji, 3-nji orna hem Köneürgenç etrabyndaky 59-njy orta mekdepleriň ýaş ýangyn söndürijiler toparlarynyň mynasyp bolandyklary yglan edildi. Bäsleşigiň ýeňijilerine, şeýle-de onda tapawutlanan türgenlere diplomlar, ýadygärlik sowgatlary gowşuryldy. Şeýle hem 1-nji orny eýelän topar şu bäsleşigiň döwlet tapgyryna gatnaşmaga hukuk gazandy.