Watanymyzyň durmuşynda taryhy waka

Hormatly Prezidentimiziň taýsyz tagallalarynyň netijesinde Garaşsyz, baky Bitarap döwletimiz halkara derejesindäki maslahatlaryň, sammitleriň, forumlaryň yzygiderli geçirilýän ýerine öwrüldi. Şu ýylyň awgust aýynda ýurdumyzda BMG-niň Deňze çykalgasy bolmadyk ösüp barýan döwletler boýunça üçünji maslahatynyň geçirilmeginiň göz öňünde tutulmagy hem munuň şeýledigini anyk tassyklaýar.

Şu halkara maslahatyň ähmiýetini wagyz etmek maksady bilen, düýn TKA-nyň Daşoguz welaýat birleşmesiniň guramagynda «BMG-niň «Awaza» forumy: durnukly ösüşiň bähbidine» atly maslahat geçirildi. Onda çykyş edenleriň guwanç bilen nygtap geçişleri ýaly, bu halkara forum Gahryman Arkadagymyzyň we Arkadagly Gahryman Serdarymyzyň çäksiz aladalary bilen ýurdumyzyň dünýädäki abraý-mertebesiniň barha ýokary göterilýändiginiň, döwletleriň arasynda ähli ugurlar boýunça, şol sanda ykdysady gatnaşyklary pugtalandyrmaga uly goşant goşýandygynyň subutnamasy bolup durýar.

Dabarada çykyş edenler BMG-niň ýurdumyzda geçirilmegi meýilleşdirilen Deňze çykalgasy bolmadyk ösüp barýan döwletler boýunça üçünji maslahatynyň Halkara parahatçylyk we ynanyşmak ýylynda Garaşsyz, baky Bitarap ýurdumyzyň durmuşyndaky taryhy wakalaryň birine öwrüljekdigini, onuň dünýä ýurtlarynyň özara gatnaşyklarynyň ösdürilmegine ýardam berjekdigini nygtadylar.