Wagyz-nesihat maslahaty

«Sagdyn jemgyýet — berkarar döwlet» atly şygar bilen, Daşoguz welaýatynyň Şabat etrabynyň Gaýrat geňeşligindäki oba medeniýet öýünde wagyz-nesihat maslahaty geçirildi. Zenanlaryň arasynda sagdyn durmuş ýörelgelerini ündemek, nika bozulmalaryň öňüni almak, maşgala gymmatlyklaryny gorap saklamak we milli däp-dessurlarymyzy wagyz etmek maksady bilen geçirilen maslahata mährem eneler, etrabyň ilkinji zenanlar guramalarynyň ýolbaşçylary, işjeň agzalary gatnaşdylar.

Maslahatyň dowamynda edilen çykyşlarda Garaşsyz ýurdumyzda halkyň parahat ýaşaýşyna, maşgala bagtyýarlygyna, sagdyn jemgyýetiň berkarar edilmegine uly ähmiýet berilýändigi bellenip geçildi. Ýaşlaryň arasynda ahlak-edep kadalarynyň doly berjaý edilmeginde, milli däp-dessurlarymyzyň mizemez dowam etdirilmeginde, ýetginjek gyzlaryň okuwa, durmuşa gatnaşygynyň pugtalandyrylmagynda işjeň zenanlaryň, eneleriň öňlerinde durýan wezipeler barada giňişleýin gürrüň edildi.

Şeýle mazmundaky maslahat Boldumsaz, Akdepe, Ruhubelent etraplarynda hem ýokary guramaçylyk derejesinde, işjeň ýagdaýda geçirildi.