Wagyz-nesihat maslahaty

Sagdyn durmuş ýörelgelerini ündemek, nika bozulmalaryň öňüni almak, ahlak terbiýesini, maşgala mukaddesligini we milli ýol-ýörelgelerimizi wagyz etmek maksady bilen, Daşoguz şäher häkimliginiň mejlisler zalynda wagyz-nesihat maslahaty geçirildi. Türkmenistanyň Zenanlar birleşiginiň welaýat bölüminiň guramagynda geçirilen maslahata oba hojalyk we gurluşyk-senagat toplumlaryna degişli edara-kärhanalarda zähmet çekýän gelin-gyzlar, mährem eneler gatnaşdylar.

«Sagdyn jemgyýet — berkarar döwlet» ady bilen geçirilen maslahatda çykyş edenler ýurdumyzda döredilýän ähli şertlerden we mümkinçiliklerden peýdalanyp, halkymyzyň gadymdan dowam edip gelýän milli hem gymmatly ýörelgelerinden ugur alyp, sagdyn durmuş ýörelgelerini berkarar etmek, maşgala gymmatlygyny gorap saklamak, maşgala agzalarynyň arasyndaky gatnaşyklary pugtalandyrmak, aňyrdan gelýän halallyk ýörelgelerimize eýermek, her kimiň iş ýerinde döwlet gullukçysynyň özüni alyp baryş kadalaryny hökmany berjaý etmek, ahlak-edep kadalaryna, tebigy gözellige ygrarly bolmak ýaly asylly häsiýetlerimiziň mizemezdigini gazanmak dogrusynda nygtap geçdiler.