Wagyz-nesihat çäresi geçirildi

Halk köpçüliginiň arasynda sagdyn durmuş ýörelgelerini wagyz etmek, ýaşlary ýaramaz endiklerden goramak maksadynda, TDP-niň Daşoguz şäher komitetiniň Daşoguz welaýat maliýe-ykdysady orta hünär okuw mekdebi bilen bilelikde guramagynda golaýda «Sagdyn ýaşaýyş — bagtyýar geljek» atly şygar bilen wagyz-nesihat maslahaty geçirildi. Oňa orta hünär okuw mekdebiniň mugallymlarydyr talyplary gatnaşdylar.

Maslahatda çykyş edenler sagdyn ýaşaýşyň mekany hasaplanýan ýurdumyzda halkymyzyň sagdyn durmuşyny berkarar etmek ugrunda alnyp barylýan belent tutumlar, ýaramaz endikleriň ynsan saglygyna, geljegine, nesline ters täsiri, jemgyýetde olaryň berk ýazgarylýandygy dogrusynda belläp geçdiler. Bagtyýarlygyň mekanynda ýaşlaryň özleri hakda edilýän aladalary çyn ýürekden duýup, oňa mynasyp işleri bilen jogap bermäge çalyşmalydygy ündew edildi.