Wagyz-nesihat çäresi

Türkmenistanyň Zenanlar birleşiginiň Daşoguz welaýat bölüminiň meýilnamasyna laýyklykda, sagdyn durmuş ýörelgesini, halkymyzyň müňýyllyklaryň dowamynda kemala getiren maşgala gymmatlyklaryny hem-de bular bilen baglanyşykly milli däp-dessurlarymyzy wagyz etmek maksady bilen, şu günler welaýatyň etrapdyr şäherlerinde «Sagdyn jemgyýet — berkarar döwlet» atly wagyz-nesihat çäreleri guramaçylykly dowam etdirilýär.

Şeýle mazmundaky wagyz-nesihat çäreleri TZB-niň etrap bölümleriniň guramagynda Köneürgenç etrap pagta egriji fabriginde we Saparmyrat Türkmenbaşy etrap Medeniýet merkezinde hem geçirildi. Olara etraplardaky dürli kärlerde zähmet çekýän zenanlar, jemgyýetçilik guramalarynyň işjeň agzalary hem-de mährem eneler gatnaşdylar. Olarda ene-mamalarymyzyň durmuş ýörelgesine öwrülen maşgala we ahlak gymmatlyklary hakynda täsirli söhbet edildi. Guramaçylykly we işjeň ýagdaýda geçen wagyz-nesihat çärelerinde öý-ojak mukaddesligi, milli däp-dessurlarymyz, el işlerimiz, edim-gylymlarymyz, ahlaklylyk, päkizelik baradaky tymsallaryň, rowaýatlaryň, dana sözleriň terbiýeçilik ähmiýeti dogrusynda gürrüňdeşlik geçirildi. Wagyz-nesihat çäreleriniň dowamyndaky gyzykly söhbetdeşlikler oňa gatnaşanlarda uly täsir galdyrdy.