Tomus — 2026

Hazar tolkunlary, gyzykly gurnaklar we şadyýan pursatlar

Tomus paslynyň başlanmagy bilen, ýurdumyzyň dürli künjeklerinden gelen mekdep okuwçylarynyň dynç alyş we sagaldyş merkezlerinde iň arzyly we ýatda galyjy günleri dowam edýär. Çagalaryň tomusky dynç alyş möwsümini manyly, gyzykly geçirmekleri üçin TKA-nyň Milli merkeziniň «Awaza» milli syýahatçylyk zolagynda ýerleşýän «Daýanç» sagaldyş we dynç alyş merkezi hem şeýle şadyýan pursatlaryň mekanyna öwrüldi. Daşoguz welaýatyndan hem mekdep okuwçylary 5 tapgyrda, her tapgyrda 36 çaga bu ýerde wagtlaryny manyly geçirýärler.

Deňziň ekologik taýdan arassa, jana şypaly hoştap howasy bilen utgaşýan bu merkezde körpeleriň ýatdan çykmajak tomus günlerini guramak üçin ähli amatlyklar döredilen. Bu ýerde dynç alýan ýaş nesilleriň diňe bir wagtlaryny şadyýan geçmekleri däl, eýsem, saglygyny berkitmekleri hem üns merkezinde saklanylýar. Ýokary hünärli lukmanlar tarapyndan çagalaryň fiziki taýdan taplanmaklary üçin dürli öňüni alyş çäreleri, ýod-bromly we ösümlik wannalary, şeýle hem açyk meýdandaky sport çäreleri we akwapark suw oýunlary yzygiderli guralýar.

Merkezde çagalaryň täze bilimleri we endikleri öwrenmekleri üçin hem hemme mümkinçilikler bar. Bu ýerde iň tejribeli mugallymlaryň we terbiýeçileriň ýolbaşçylygynda dürli gurnaklar — daşary ýurt dilleri we kompýuter sowatlylygy, sungat we senetçilik, aýdym we tans gurnaklary hereket edýär. Şonuň ýaly-da medeni-köpçülikleýin we sport çäreleri yzygiderli guralýar.

Kenarýaka boýunça gezelençler, Hazar deňziniň täsinlikleri bilen tanyşlyk çagalaryň dünýägaraýşyny giňeltmek bilen, olarda tebigata aýawly çemeleşmäni kemala getirýär.