Tebigatyň görki — baglar

Ýurdumyzda ekologiýa abadançylygyny gorap saklamak, tebigatymyzy has gözelleşdirmek üçin alnyp barylýan tutumly işler öwgä mynasypdyr.

Ýer ýüzünde tebigata aýawly garamak, ekologiýa abadançylygyny üpjün etmek babatda Birleşen Milletler Guramasynyň belent münberinden ýurdumyzyň öňe süren teklipleri, ajaýyp başlangyçlary dünýä döwletleri tarapyndan giňden goldanylýar. Şeýle hem Türkmenistan bu guramanyň çäklerinde ekologiýa meseleleri boýunça birnäçe halkara Konwensiýalaryň agzasy hökmünde çykyş edýär.

Mälim bolşy ýaly, al-ýaşyl baglyga bürenen tebigat diňe bir gözellik bolman, eýsem, ynsan saglygynyň hem girewi hasaplanýar. Halkymyzyň saglygy iň gymmatly baýlyga deňelýän ata Watanymyzda her ýylda ýazky we güýzki bag ekişlik dabarasyna Türkmenistanyň Prezidenti, türkmen halkynyň Milli Lideri Gahryman Arkadagymyz, ýaşuly nesliň wekilleri, kümüş saçly eneler, talyp ýaşlar, ykdysadyýetimiziň dürli pudaklarynda zähmet çekýän raýatlar işjeň gatnaşýarlar.

Bag tebigatyň gözelligini, ekologiýamyzyň abadançylygyny we arassalygyny üpjün edýär. Zähmet bilen döredilýän bu ajaýyp gözellikler ynsan saglygyna hem oňaýly täsirini ýetirýär.