Täze ýyl baýramçylyk agşamy

Hemmeleriň garaşýan, uly arzuw-umytlar bilen garşylaýan Täze ýyl baýramçylygy mynasybetli golaýda  TZB-niň Daşoguz welaýat bölüminiň guramagynda Daşoguz şäherindäki «Bedew» toý mekanynda baýramçylyk dabarasy geçirildi. Oňa welaýatyň dürli pudaklarynda zähmet çekýän öňdebaryjy zenanlar gatnaşdylar.

Baýramçylyk dabarasynda çykyş edenler buýsançly şygara beslenen şöhratly ýylda ata Watanymyzyň durmuşynda bolup geçen taryhy wakalar dogrusynda giňişleýin belläp geçdiler. Şeýle hem eziz Diýarymyza gadam basýan Täze – 2026-njy ýyl mynasybetli dabara gatnaşyjylar birek-biregi mähirli gutladylar.

Toý mekanynyň göz gamaşdyryjy, dürli arçalardyr, yşyklaryň nur saçýan bezemen sahnasyna Aýazbabadyr Garpamygyň gelmegi hemmelerde uly şowhun döretdi. Zenanlar bije çekip, Aýazbabanyň torbasyndan öz bijesinden çykan baýramçylyk sowgatlaryny aldylar. Bu ajaýyp pursatlar dabaranyň mazmunyny has-da baýlaşdyryp, zenanlaryň buýsançly kalplaryny öňküden-de joşdurdy. Göçgünli ýaňlanan aýdymlar tanslar bilen sazlaşyp, owadan pursatlary emele getirdi. Zenanlar hem çagalar tarapyndan dokma önümleriniň görkeziliş pursatlary dabaranyň  täsirliligini artdyrdy.