Sürüm işleri ýokary depginde

«Pähim-paýhas ummany Magtymguly Pyragy» ýylynda köp zähmet siňdirilip ýetişdirilen «ak altyny» iň soňky hanasyna çenli ýitgisiz ýygnap alyp, Watan harmanyna tabşyrmaklygy öndürijilikli dowam etdirýän Daşoguz welaýatynyň pagtaçy daýhanlary, şol bir wagtyň özünde, hasyldan boşan meýdanlarda sürüm işlerine hem agzybirlik bilen girişip, bu derwaýys çäräniň depginini günsaýyn güýçlendirýärler. Bu babatda olara etraplardaky «Obahyzmat» önümçilik kärhanalarynyň mehanizatorlarynyň uly goldaw berýändiklerini bellemek bolar.

Daşoguz welaýatynyň beýleki ýerlerinde bolşy ýaly, Görogly etrabynyň Magtymguly adyndaky daýhan birleşiginde hem şu ýylyň sürüm möwsümine öz wagtynda badalga berlip, ilkinji günlerden onuň depgini ýokary göterildi. Birleşigiň baş agronomy Jumageldi Çülliýewiň aýtmagyna görä,1600 gektardan gowrak meýdanda sürüm işlerini geçirmek wezipesi öňde durýar. Şondan ugur almak bilen, gowaça çöpünden arassalanan meýdanlarda bu işiň bökdençsiz alnyp barylmagy üçin birkemsiz taýýarlyk görüldi. Bu hem sürümiň öndürijilikli dowam etdirilmegine, hiliniň ýokary bolmagyna oňaýly täsirini ýetirýär.