Söhbetdeşlik geçirildi

Daşoguz welaýat häkimliginiň, Türkmenistanyň Magtymguly adyndaky Ýaşlar guramasynyň welaýat geňeşiniň bilelikde guramagynda Daşoguz şäheriniň «Türkmeniň ak öýi» binasynda hormatly Prezidentimiziň 2025-nji ýyly döwrebap atlandyrmak we onuň nyşanyny kesgitlemek bilen bagly teklip bermek barada beren tabşyrygyny ýerine ýetirmek maksady bilen «tegelek stoluň» başynda söhbetdeşlik geçirildi.

Söhbetdeşlige Türkmenistanyň Mejlisiniň deputatlary — Magsat Otuzow, Kakamämmet Nepesow, Aýgözel Kutlyýewa, şeýle-de şäher halk maslahatynyň başlygy Allanazar Garajanow, TMÝG-niň welaýat geňeşiniň bölüm müdiri Aýnur Ýusupowa dagy gatnaşdylar.

Söhbetdeşlikde dünýäniň parahatçylygynyň ähli döwürde-de adamzadyň baş maksady bolup galýandygy, oňa berkarar döwletimiziň başlangyjy bilen, BMG-niň Baş Assambleýasynyň Kararnamasy esasynda 2025-nji ýylyň «Halkara parahatçylyk we ynanyşmak ýyly» diýlip yglan edilmegi hem doly esas bolup durýandygy nygtaldy.