Söhbetdeşlik geçirildi

Golaýda TKA-nyň Daşoguz welaýat birleşmesiniň guramagynda Türkmenistanyň Prezidentiniň mähriban atasy, türkmen halkynyň Milli Lideri Gahryman Arkadagymyzyň kyblasy, içeri işler edaralarynyň hormatly weterany Mälikguly Berdimuhamedowyň nusgalyk ömür ýoluna bagyşlanyp «tegelek stoluň» başynda söhbetdeşlik geçirildi. «Mälikguly Berdimuhamedowyň ömür ýoly görelde mekdebidir» atly şygar bilen geçirilen söhbetdeşlikde mawy ekran arkaly görkezilen, halkymyzda uly buýsanç döreden taryhy wakanyň ýakymly täsirleri barada özara pikir alşyldy.

Has aňyrlardan gaýdýan peder ýörelgesiniň hem göreldesiniň bu günki gün türkmeniň bagtyna ak Güneşiň nuruny bolluk bilen eçilýändigi barada buýsançly söhbet edildi. Içeri işler edaralarynyň weterany Mälikguly Berdimuhamedowyň zähmet ýoly, maşgalabaşy hökmünde nusgalyk göreldesi hemmeler üçin uly mekdepdir. Watan mukaddesligini gorap saklamak, onuň içerki asudalygyny, kanunlaryň, düzgün-tertibiň berk berjaý edilişini hemişe gözegçilikde saklamak bilen, öz borjuňy berjaý etmek we çeken halal hem tutanýerli zähmetiň üçin yzygider hormatlanmak, sylaglara mynasyp bolmak — bu mert hem merdana Watan oglunyň, gullukçynyň mukaddes borjy, nesillere göreldesi. Şeýle beýik derejäni öz durmuşynda jemläp bilen Mälikguly Berdimuhamedowyň nesillere galdyran nusgalyk ýoly döwürleriň, zamanlaryň, eýýamlaryň mazmunyna öwrülip, hemişe ýollara ýagty saçjak şamçyrag bolar.