Şanly ýyla bagyşlandy

Golaýda Türkmenistanyň Magtymguly adyndaky Ýaşlar guramasynyň Görogly etrap geňeşi etrap häkimligi, etrabyň beýleki jemgyýetçilik guramalary, bilim, medeniýet, sport, saglyk ulgamlary bilen bilelikde etrabyň medeniýet öýünde «Ata ýurdum baky bagtyň mekany — ýaňlanyp dur parahatlyk mukamy» atly şygar astynda aýdym-sazly dabaraly maslahat geçirdi. Oňa etrabyň il sylagly ýaşululary, mährem eneler, syýasy-jemgyýetçilik guramalarynyň wekilleri, edara-kärhanalarda zähmet çekýän ýaşlar gatnaşdylar.

Dabaraly maslahatda çykyş edenler şanly ýylyň şygaryny dabaralandyrmak, Halkara parahatçylyk we ynanyşmak ýyly bilen baglanyşykly geçirilýän medeni we syýasy çäreleriň mazmunyny halk arasynda wagyz etmek, geçirilýän çärelere ýaşlaryň işjeň gatnaşmaklaryny gazanmak, döwlet we halkara derejesinde geçirilýän maslahatlar, sammitler, forumlar, olaryň ähmiýeti, halkymyzyň parahat, asuda, bolelin durmuşda ýaşamaklaryny üpjün etmek maksady bilen durmuşa geçirilýän özgertmeler dogrusynda giňişleýin durup geçdiler. Maslahatyň dowamynda etrabyň medeniýet-sungat işgärleriniň taýýarlan aýdym-sazly çykyşlaryna hem giň orun berildi.