Sanly bilim ulgamy — bilimleriň ak ýoly

Ýurdumyzda hormatly Prezidentimiziň bilim özgertmeleriniň esasynda durmuşa geçirilýän işler, ilkinji nobatda, ulgamyň döwrebaplaşdyrylmagyna we ýaş nesliň kämil bilim almagyna, geljekde Watanymyzyň kuwwatyny artdyrjak ussat hünärmenleriň ösdürilip ýetişdirilmegine gönükdirilendir.

Sanly bilimi ösdürmek üçin, ilkinji nobatda, bilim ulgamynda zähmet çekýän mugallymlaryň, hünärmenleriň, şeýle-de bilim alýanlaryň häzirki zaman kompýuter tehnologiýalaryndan ussatlyk bilen baş çykarmaklary zerur hasaplanyp, ýurdumyzda bu ugurdan döwrebap okuw-usuly işler amala aşyrylýar.

Daşoguz welaýatynyň Beki Seýtäkow adyndaky mugallymçylyk mekdebinde hem bu Konsepsiýa laýyklykda, sanly bilim ulgamyna geçmek boýunça giň möçberli işler alnyp barylýar.

Mekdebiň okuw otaglary ösen innowasion tehnologiýalar bilen üpjün edilen bolup, mugallymlaryň we talyp ýaşlaryň kompýuter sowatlylygy yzygiderli kämilleşdirilýär.

Bilim ojagynyň elektron kitaphana gory yzygiderli baýlaşdyrylýar, dersler boýunça döwrebap elektron okuw-usuly toplumlar — elektron okuw kitaplary, okuw gollanmalary, wideo-audiomateriallar, interaktiw-multimedia programmalary, okuw-görkezme esbaplary, maglumat kitapçalary döredilýär. Mekdebiň mugallymlary tarapyndan taýýarlanan okuw gollanmalarydyr kitaplary sanly görnüşde elektron kitaphanada ýerleşdirilýär.

Ýurdumyzda milli bilim ulgamyny kämilleşdirmekde durmuşa geçirilýän özgertmeler rowaçlygyň kepilidir. Çünki ösen ylym-bilim ähli pudaklarda işleri rowaçlandyrýan güýçdür. Şonuň üçin biziň her birimiziň ata Watanymyzyň gülläp ösmegi üçin yhlasly zähmet çekmegimiz mukaddes borçdur.