Şaly ekişi guramaçylykly dowam edýär

Hormatly Prezidentimiziň Halkara parahatçylyk we ynanyşmak ýylynda ýurdumyzda şalynyň öndürilişini artdyrmak barada kabul eden Kararyna laýyklykda, Daşoguz welaýatynyň bu gymmatly ekiniň esasy ýetişdirilýän ýeri bolan Saparmyrat Türkmenbaşy etrabynda onuň ekişine hemmetaraplaýyn taýýarlykly girişilip, häzirki günlerde şeýle möhüm çäräniň depgini günsaýyn artýar. Mälim bolşy ýaly, şu ýyl etrap boýunça 8100 gektar meýdanda şalynyň bol hasylyny ýetişdirmek meýilleşdirilýär. Bu babatda etrabyň S.A.Nyýazow adyndaky hem-de «27-nji oktýabr» daýhan birleşikleriniň şalyçy kärendeçileriniň uly tejribesi bar. Şoňa görä-de, olar ekişi öz wagtynda, ýokary hilli geçirmegiň ähmiýetine örän oňat düşünmek bilen, bu ugurda döredilýän ähli şertlerden netijeli peýdalanmaga çalyşýarlar. Şeýlelikde, etrabyň şalyçylyga ýöriteleşdirilen hojalyklarynda ekiş geçirilen meýdanlaryň möçberi barha artýar. Bu bolsa zähmetsöýer şalyçylaryň şu ýylda hem Watan harmanynyň belent bolmagyna saldamly goşant goşjakdyklarynyň alamatydyr.