Salamlaşmak edebi

Edep salamdan başlanýar. Salamlaşmak ynsana mahsus bolan ajaýyp häsiýet bolup, adamlary biri-birine ýakynlaşdyrýar, ysnyşdyrýar, doganlaşdyrýar. Salamlaşmagyň manysy birek-birege parahatçylyk, dynçlyk arzuw etmekdir.

Ata-babalarymyzdan nesilme-nesil geçip gelen, hiç bir kanunda ýazylmadyk gowy ýol-ýörelgelerimiz bar. Ýaşy kiçi ýaşy ula, atly barýan pyýada, myhman öý eýesine salam berýär.

Görüşmegiň hem öz düzgünleri bar. Märekä baranyňda saňa iň ýakyn adamdan — ataňdan, kakaňdan, agaňdan başlap, eger olar ýok bolsa, ýaşuludan, ylymly adamdan başlap görüşilýär. Diňe şunuň özi hem milletimiziň ýaşululara, ylymly adamlara goýýan aýratyn hormatynyň nyşanydyr.

Görüşilende iki eliň uzadylýar. Syn edýän bolsaňyz, ýaşulularymyz görşende, eli bilen başam barmagy gysýandyrlar. Çünki halk arasynda «Hydyr atanyň başam barmagynyň süňki ýokmuş» diýen düşünje bar. Hydyr ata duşsaň ähli dilegleriň kabul bolarmyş.

Owaldan gelýän däbimize görä, zenanlar bilen salamlaşylanda, onuň ýanýoldaşynyň hatyrasy belent tutulýar. Ýaşy kiçi zenanyň ýanýoldaşy uly bolsa, ýaşy uly aýal ýaşy kiçi zenana salam berýär.

Agzy ýaşmakly gelniň uly adamlara salam berende, iki elini döşünde goýup, başyny egýän pursatlary-da bar. Zenanlar biri-biri bilen görşende, ýaşy kiçi ýaşy uly zenanyň öňünde başyny egýär, ýaşy uly zenan onuň egnine iki eli bilen kakýar.

Ata-babalarymyzyň aýdan parasatly sözleri, döreden nakyllary, ertekileri, tymsallary, olaryň geçen durmuş ýollary biziň üçin mekdepdir. Ana, şol mekdepden öwrenýänlerimiz bolsa, biziň her birimiziň abraýymyzyň, ömrümiziň hiç wagt solmajak bezegidir.