Sahnada dünýä edebiýatynyň dürdänesi

Hemişelik Bitaraplygymyzyň 30 ýyllygy mynasybetli ýurdumyzyň teatrlarynda dünýä edebiýatynyň görnükli wekilleriniň eserleri esasynda sahnalaşdyrylan spektakllaryň «Hemişelik Bitaraplyk — dost-doganlyk binýady» atly hepdeliginiň çäginde Daşoguz şäherindäki Nurmuhammet Andalyp adyndaky döwlet sazly drama teatrynda meşhur italýan dramaturgy Karlo Goldoniniň «Kýojadaky wakalar» atly komediýasy sahnalaşdyryldy.

Oýun goýujy režissýor Bekmyrat Hallyýewiň sahnalaşdyran spektaklynda ynsan durmuşy täsirli, gülküli wakalaryň üsti bilen janlandyrylýar. Sahna suratkeşi Şemşat Şyhyýewanyň taýýarlan sahna bezeglerinde XVIII asyr italýan şäherçesiniň özboluşly keşbi aýdyň şöhlelenýär. Spektaklyň şowhunly baýramçylyk ruhy, gahrymanlaryň janly keşbi hem-de henekli gürrüňleri tomaşaçylary biparh galdyrmaýar.

Teatryň agzybir döredijilik toparynyň taýýarlan bu spektakly Bitaraplyk baýramyna ajaýyp sowgat boldy.