Sagdyn geljegiň binýady

Türkmenistanyň Saglygy goraýyş we derman senagaty ministrliginiň, Onkologiýa ylmy-kliniki merkeziniň, welaýat Saglygy goraýyş müdirliginiň hem-de onkologiýa hassahanasynyň bilelikde guramagynda «Süýt mäzleriniň howply täze döremeleriniň öňüni almak, ir ýüze çykarmak, anyklamak we bejermek» atly ylmy-amaly maslahat geçirildi.

Maslahata dürli ugurlarda zähmet çekýän ildeşlerimiz gatnaşdylar. Onuň dowamynda edilen çykyşlarda süýt mäzleriniň howply täze döremeleriniň öňüni almak boýunça geçirilýän işler, bu babatda ylmy taýdan esaslandyrylan lukman maslahatlary barada aýratyn durlup geçildi.

Maslahatyň dowamynda «Sagdyn ene — sagdyn çaga — sagdyn geljek» atly Milli strategiýanyň çäklerinde geçirilýän şeýle giň gerimli çäreleriň uly ähmiýetiniň bardygy bellenildi. Şeýle hem ynsan saglygyny goramak babatda ýurdumyzda alnyp barylýan beýik işler hakynda buýsançly gürrüň edildi.