Röwşen geljegimiziň binýady

Halkara Bitaraplyk güni hem-de hemişelik Bitaraplygymyzyň 29 ýyllygy mynasybetli golaýda Daşoguz welaýat häkimliginiň mejlisler zalynda «Bitaraplyk — röwşen geljegimiziň baky binýady» atly dabaraly maslahat geçirildi. Maslahata welaýat, şäher, etrap häkimlikleriniň jogapkär işgärleri, Mejlisiň deputatlary, Türkmenistanyň Daşary işler ministrliginiň welaýat boýunça wekilhanasynyň, syýasy-jemgyýetçilik guramalaryň wekilleri, bilim, saglygy goraýyş, sport, medeniýet ulgamlarynyň işgärleri, döwlet sylaglaryna mynasyp bolan adamlar, il sylagly ýaşulular, mährem eneler, talyp ýaşlar gatnaşdylar.

Maslahatda, ilki bilen, welaýat häkiminiň orunbasary Ogulaltyn Çerkezowa çykyş edip, Watanymyzyň hemişelik Bitaraplygynyň 29 ýyllygy bilen gutlap, ata Watanymyzyň hemişelik Bitaraplyk derejesiniň tutuş dünýäde halklaryň arasyndaky dost-doganlygy, parahatçylygy, hoşniýetli gatnaşyklary pugtalandyrmakdaky ähmiýeti dogrusynda giňişleýin belläp geçdi.

Şeýle-de maslahatda çykyş edenler Birleşen Milletler Guramasy tarapyndan iki gezek ykrar edilen ýurdumyzyň hemişelik Bitaraplygynyň tutuş dünýä jemgyýetçiliginiň we bagtyýar geljegiň bähbitlerine gönükdirilen dost-doganlyk, parahatçylyk söýüjilik, hoşniýetlilik ýörelgeleriň esasynda bu günki gün Ýer ýüzünde abadançylygy hem ösüşi pugtalandyrýandygy barada gürrüň etdiler. BMG-niň Baş Assambleýasy tarapyndan Bitaraplyk hukuk derejesi iki gezek ykrar edilen Garaşsyz döwletimiziň dünýä ähmiýetli başlangyçlary, olaryň esasynda kabul edilen çözgütler,olaryň üstünlikli durmuşa geçirilişi dogrusynda uly buýsanç bilen aýdyp geçildi.

Maslahatyň dowamynda welaýatyň medeniýet we sungat ussatlarynyň dürli halklaryň ajaýyp aýdymlaryny belent owaz bilen ýerine ýetirmekleri maslahata gatnaşyjylara ruhy lezzet paýlady.