Pähim-paýhasa hormat

Garaşsyz, baky Bitarap ýurdumyzda her ýylyň 1-nji oktýabrynda Ýaşulularyň halkara güni giňden bellenilip geçilýär. Ýaşuly nesle belent hormat-sarpanyň nyşanyna öwrülen baýramyň dabaraly çäreleri Halkara parahatçylyk we ynanyşmak ýylynyň toýly günlerinde-de aýratyn many-mazmuna eýe bolup, göwünleri galkyndyrdy.

Daşoguz welaýat häkimliginde geçirilen dabaraly maslahata welaýatyň döwlet we jemgyýetçilik guramalarynyň wekilleri, il sylagly ýaşulular, mährem eneler, ýaşlar gatnaşdylar. Dabarada çykyş edenler Berkarar döwletiň täze eýýamynyň Galkynyşy döwründe ýurdumyzda giňden bellenilýän Ýaşulularyň halkara gününiň halkymyzyň kalbynda uly orun alandygyny guwanç bilen belläp geçdiler. Çykyşlardan görnüşi ýaly, häzirki ajaýyp döwrümizde ýaşuly nesliň wekilleri ata Watanymyzyň geljegi bolan ýaşlarymyzda ynsanperwerlik, zähmetsöýerlik, ile-güne wepalylyk ýaly gylyk-häsiýetleriň terbiýelenmeginde uly hyzmatlary bitirýärler. Dilleri senaly ýaşulular toý-märekeleriň, tutumly baýramçylyklaryň bezegi bolup, agzybirligiň, jebisligiň pugtalanmagyna uly goşant goşýarlar. Şonuň netijesinde olaryň abraý-mertebesi, sarpasy hemişe belent saklanylýar.

Baýramçylyk çäresinde ýaşuly nesliň wekillerine welaýatyň jemgyýetçilik guramalarynyň taýýarlan gymmat bahaly sowgatlary dabaraly gowşuryldy. Baýramyň şanyna şirin aýdym-sazlar belent ýaňlanyp, ýygnananlara ruhy lezzet paýlady.

Baýramçylyk mynasybetli Daşoguz şäheriniň Görogly meýdançasynda geçirilen aýdym-sazly dabara hem ýakymly öwüşginlere beslenip, ýaşulularymyza goýulýan çäksiz hormat-sarpany alamatlandyrdy.