Oraza baýramyna

Mizemez ýörelgeleriň dabaralanmagy

Hormatly Prezidentimiziň parasatly baştutanlygynda täze taryhy döwrümizde hem halkymyzyň gadymdan gelýän ruhy-ahlak ýörelgeleri giňden dabaralandyrylýar. Ynsanperwer häsiýete ýugrulan, adamlary bir-birege ýakynlaşdyrýan, ýagşy amallaryň berjaý edilýän mukaddes Oraza aýy milli hem mizemez ýörelgeleriň çuňňur häsiýetde amal edilýändigi bilen aýratyn tapawutlanýar.

Oraza baýramy ynsanperwerligiň we hoşniýetliligiň belent ýörelgelerini özünde jemleýän ahlak tämizliginiň we ruhy kämilligiň baýramydyr. Bu baýram halkymyzyň däp-dessurlary, ynanç-adatlary, ruhy-ahlak ýörelgeleri siňen, geljekki nesiller üçin gymmatly miras hökmünde dowamata-dowamdygy bilen ähmiýetlidir.

Mähriban halkymyz häzirki zaman dünýäsinde päkligiň, dostlugyň, agzybirligiň, ynsanperwerligiň nyşanyna öwrülen Oraza baýramyny tutuş döwlet derejesinde giňden dabaralandyrýar. Baýram gününiň ir säheri ýurdumyzyň ähli metjitlerinde Baýram namazy okalýar.