Okuw maslahaty guraldy

Golaýda Halkara parahatçylyk we ynanyşmak ýylynyň bereketli pagta hasylynyň ýygnalýan we saklanylýan döwründe ýangyn howpsuzlygynyň düzgünleriniň pugta berjaý edilmegine bagyşlanyp, Daşoguz welaýat Polisiýa müdirliginiň ýangyn howpsuzlygy bölüminiň «Daşoguzpagta» önümçilik birleşigi bilen bilelikde guramagynda Boldumsaz etrabynyň Gubadag şäherindäki pagta arassalaýjy kärhanasynda okuw maslahaty geçirildi. Oňa pagtany kabul edýän, gaýtadan işleýän kärhanalaryň tehniki howpsuzlyk we zähmeti goramak bölümleriniň işgärleri, ýangyn howpsuzlygyna jogapkär adamlary, meýletin ýangyn söndürijiler toparlarynyň agzalary gatnaşdylar.

Ýangyn howpsuzlygynyň öňdebaryjy tejribelerini, ýangyn-tehniki bilimleri, oňa degişli serişdeleriň ulanylyşyny jogapkär işgärlere öwretmek maksadynda geçirilen maslahatda çykyş edenler ýetişdirilen bol hasyly ýangyndan goramakda zerur bolan çäreler, olary amala aşyrmagyň usullary hem-de ýangyn-tehniki serişdeleriniň ulanylyşy barada giňişleýin düşündiriş berdiler.