Okuw maslahaty geçirilýär

Türkmenistanyň Kärdeşler arkalaşyklarynyň Daşoguz welaýat birleşmesi tarapyndan welaýatyň edara-kärhanalarynda, daýhan birleşiklerinde, işgärleriň, kärendeçileriň arasynda Türkmenistanyň zähmet kanunçylygynyň kadalaryny we zähmeti goramak, sagdyn, howpsuz iş şertlerini döretmek bilen bagly kanunçylyk namalaryny düşündirmek boýunça okuw maslahatlary guramaçylykly geçirilýär.

Ýakynda şeýle çäreleriň biri TKA-nyň Daşoguz welaýatynyň Köneürgenç etrap birleşmesi tarapyndan etrabyň pagta egriji fabriginde guraldy. Oňa welaýat, etrap birleşmeleriniň jogapkär işgärleri, etrabyň edara-kärhanalarynyň zähmeti goramak we tehniki howpsuzlyk boýunça hünärmenleri, KA-nyň işjeň agzalary gatnaşdylar. Bu ýerde edilen çykyşlarda Garaşsyz Diýarymyzda ynsan saglygyny goramakda, adamlar üçin iň amatly durmuş, zähmet we dynç alyş şertlerini döretmekde ýetilen ýokary sepgitler hakynda buýsançly gürrüň edildi. Şonuň ýaly-da, zähmetkeşleriň iş we zähmet şertlerini ýokarlandyrmakda, jemgyýetimizde agzybirligi we jebisligi pugtalandyrmakda, edara-kärhanalarda tehniki howpsuzlyk we zähmeti goramak boýunça alnyp barylýan işlere jemgyýetçilik gözegçiligini amala aşyrmakda kärdeşler arkalaşyklarynyň alyp barýan işleriniň netijeliligini has-da ýokarlandyrmak barada durlup geçildi.