Okuw maslahaty geçirildi

Golaýda ýurdumyzyň Merkezi saýlaw toparynyň edarasynyň wekilleriniň gatnaşmagynda Daşoguz welaýat häkimliginiň kiçi mejlisler zalynda okuw maslahaty geçirildi. Oňa welaýat, şaher, etrap häkimlikleriniň jogapkär işgärleri, saýlaw toparlarynyň agzalary gatnaşdylar.

Okuw maslahaty «Saýlawçylaryň bitewi döwlet sanawy hakynda» Türkmenistanyň Kanunyny ýerine ýetirmek, saýlawçylaryň bitewi döwlet sanawyny döretmek boýunça işleriň guramaçylykly alnyp barylmagyny gazanmak maksady bilen geçirildi.

Maslahatyň dowamynda çykyş edenler hormatly Prezidentimiziň saýlawlary guramaçylykly geçirmek baradaky uly aladalarynyň netijesinde, ýurdumyzda saýlawlaryň demokratik esasda, Türkmenistanyň Konstitusiýasyna we Saýlaw kodeksine, şeýle hem umumy ykrar edilen halkara kadalaryna laýyklykda geçirilýändigi dogrusynda uly buýsanç bilen gürrüň etdiler. Şeýle-de, degişli kanunçylyga laýyklykda saýlawçylaryň bitewi sanawyny döretmek we ýöretmek bilen bagly wezipeler barada giňişleýin düşündiriş berildi.

Soňra maslahatyň gün tertibine seredilen meseleler boýunça özara sowal-jogap alşyldy.