Naryň peýdasy

Adamyň saglygyna oňyn täsirini ýetirýän miweleriň biri hem nardyr. Naryň düzüminde kaliý, kalsiý, demir ýaly minerallaryň, mikroelementleriň, С, P, B6, B12, K, A witaminleriň, foliý turşusynyň köp mukdarda saklanýandygy sebäpli immun ulgamyny ýokarlandyrmakda, gan damarlaryny berkitmekde, nerw ulgamynyň işjeňligini kadalaşdyrmakda, bedende alyş-çalyş hadysasyny gowulandyrmakda örän peýdalydyr. Şeýle hem ýürek-damar ulgamynyň kesellerinde, gan basyşynyň ýokarlanmagynda, ganyň düzümindäki holesterini peseltmekde naryň peýdasy gaty uludyr. Görejiň ýitileşmegine, deri örtükleriniň owadan we çeýe bolmagyna hem naryň oňaýly täsiri bar. Naryň öt çykaryjy, bagryň işini kadalaşdyryjy häsiýetleri hem bar. Nary birnäçe kesellerde lukmanyň maslahaty bilen iýmek maslahat berilýär. Naryň peýdaly häsiýetlerine esaslanyp, ony iýmit hökmünde sowuklama kesellerinde, demgysmada, gan basyş ýokarlananda, bagryň we böwrekleriň sökelliklerinde, lukmanyň maslahaty bilen kabul etmeli. Naryň şiresi bedeni gurplandyrmakda has peýdalydyr.

Naryň peýdaly iýmitdigine garamazdan, onuň düzüminde turşulygy ýokarlandyrýan maddalaryň saklanýandygy sebäpli ony käbir kesellerde, aýratyn hem, aşgazan asty mäziň kesellerinde, dowamly gastritde, aşgazanyň we on iki barmak içegäniň baş kesellerinde ulanmak maslahat berilmeýär. Şeýle hem naryň şiresiniň düzümindäki turşulygyň dişleriň syrçasyna ýaramaz täsir edýändigi sebäpli oňa suw garyp içmek ýa-da ýörite turbajyklar arkaly kabul etmek maslahat berilýär.