Mizemez ýörelgä ygrarlylyk

Halkara parahatçylyk we ynanyşmak ýylyny dabaralandyrmak maksady bilen, golaýda «Daşoguz habarlary» gazetiniň redaksiýasynyň TDP-niň Daşoguz şäher komiteti hem-de Daşoguz welaýat kitaphanasy bilen bilelikde guramagynda «tegelek stoluň» başynda söhbetdeşlik geçirildi. «Parahatçylyk hem ynanyşmak — türkmen diplomatiýasynyň baş ugry» atly şygar bilen geçirilen söhbetdeşlige Türkmenistanyň Mejlisiniň deputatlary Ýeňiş Haýtjanow, Ogulşad Durdymedowa, «Daşoguz habarlary» gazetiniň bölüm redaktory Mahym Piriýewa, TDP-niň Daşoguz şäher komitetiniň bölüm müdiri Aýsoltan Nurmedowa, partiýa guramaçysy Didar Osmanow, welaýat kitaphanasynyň direktorynyň orunbasary Yhlas Saparow dagy gatnaşdylar.

Söhbetdeşligiň dowamynda türkmen halkynyň Milli Lideri Gahryman Arkadagymyzyň pähim-parasadyndan, halkyň isleg-arzuwyndan, dünýä jemgyýetçiliginiň köňül ykraryndan gözbaş alan buýsançly şygaryň şu ýylymyzyň mazmunynyň düýp esasy bolup dabaralanjakdygy barada uly buýsanç bilen gürrüň edildi. Ýurdumyzyň halkara giňişligindäki ornunyň barha pugtalanýandygyny açyk-aýdyň görkezýän işleriň ählisiniň düýp özeninde hormatly Prezidentimiziň taýsyz tagallalarynyň öz beýanyny tapýandygy dogrusynda nygtalyp geçildi. Ýurdumyz hemişelik Bitaraplyk syýasatynyň esasynda dünýäde parahatçylygy pugtalandyrmak, durnukly ösüşi üpjün etmek, döwletleriň arasyndaky dürli ugurly gatnaşyklaryň gerimini giňeltmek ýaly meselelerde işjeň çykyş edip, öz başlangyçlaryny hem-de tekliplerini öňe sürýär. Dünýä tejribesi türkmen Bitaraplygynyň gudratyna, gymmatyna, ähmiýetine doly göz ýetirip, onuň adamzat jemgyýetiniň ykbalyna ýetirýän öwrülişikli täsirine, parahatçylyk söýüjilik ýörelgesine uly ynam bilen bil baglaýar. Şeýle esasly çäreleriň aglabasynyň şu ýylymyzy boýdan-başa gurşap aljakdygy, baky Bitaraplygymyzyň 30 ýyllyk ýubileý senesiniň giňden dabaralandyryljakdygy barada çykyşlarda täsirli beýan edildi. Bu babatda öňde durýan wezipeler, olary durmuşa geçirmegiň ugurlary barada pikir alşyldy.