Maslahat geçirildi

Daşoguz welaýatynyň Daşoguz şäherindäki daşary ýurt dillerine ýöriteleşdirilen 25-nji orta mekdebinde Türkmenistanyň Bedenterbiýe we sport baradaky döwlet komitetiniň, Bilim ministrliginiň we «Türkmenistan» ýaşlar bedenterbiýe-sport guramasynyň guramagynda umumybilim berýän orta mekdeplerde bedenterbiýe sapaklaryny okatmagyň usulyýetini kämilleşdirmäge bagyşlanan maslahat geçirildi. Oňa welaýatyň bilim we sport edaralarynyň ýolbaşçylary, işgärleri, etrapdyr şäherlerdäki orta mekdepleriň bedenterbiýe mugallymlary gatnaşdylar.

Maslahatda çykyş edenler Berkarar döwletiň täze eýýamynyň Galkynyşy döwründe ýaşlaryň arasynda sport işjeňligini ýokarlandyrmak, ýurdumyzda sagdyn jemgyýeti kemala getirmek babatda ägirt uly işleriň amala aşyrylýandygyny buýsanç bilen nygtadylar. Şeýle hem, maslahatda orta mekdeplerde bedenterbiýe sapaklaryny okatmagyň usuly gollanmalaryny kämilleşdirmek, okuwdan daşary geçirilýän köpçülikleýin sport, bedenterbiýe-sagaldyş çärelerini giňden ýaýbaňlandyrmak hakynda gürrüň edildi.