Maşgala gymmatlygy wagyz edilýär

Maşgala mukaddesligini, maşgaladaky gatnaşyklaryň gymmatyny wagyz etmek maksady bilen, golaýda Daşoguz welaýatynyň  Saparmyrat Türkmenbaşy etrabynyň medeniýet merkezinde wagyz-nesihat maslahaty geçirildi. Türkmenistanyň Zenanlar birleşiginiň etrap guramasynyň guramagynda geçirilen maslahata etrabyň edara-kärhanalarynyň ilkinji zenanlar guramalarynyň ýolbaşçylary, işjeň agzalary, mährem eneler, talyp gyzlar gatnaşdylar.

Maslahatda guralan çykyşlarda maşgala gatnaşyklaryny pugtalandyrmakda döwletimiz tarapyndan durmuşa geçirilýän işler dogrusynda giňişleýin gürrüň etdiler. Maşgaladaky köptaraply gatnaşyklar, maşgala mukaddesligini berkarar etmek, binýadyny berkitmek, sagdyn ruhly nesliň kemala gelmegini gazanmak babatda zenanlara bildirilýän talaplar, maşgala gymmatlygyny gorap saklamakda eneleriň orny, ýaş gyzlary zähmete werziş, el hünärlerine yhlasly edip ýetişdirmek, olarda asylly häsiýetleri terbiýelemek barada durmuşy mysallara salgylanylyp täsirli söhbet edildi.

Maslahatyň gün tertibinde seredilen meseleler boýunça sowal-jogaplar alşyldy.