Mähribanlygyň işjeňlikdäki beýany

Türkmenistanyň Zenanlar birleşiginiň Merkezi geňeşiniň, Kärdeşler arkalaşyklarynyň Milli merkeziniň bilelikde ýylyň-ýylyna yglan edýän «Ýylyň zenany» bäsleşiginiň golaýynda Daşoguz welaýatynyň  Akdepe etrap tapgyry Andalyp şäher medeniýet merkezinde ýokary guramaçylyk derejesinde geçirildi.

Bäsleşige gatnaşýan zenanlar bellenen ugurlar boýunça özleriniň başarnyklaryny, mümkinçiliklerini açyp görkezdiler. Bäsleşigiň zenanlaryň döredijilik ukyplaryny, başarnyklaryny ýokarlandyrmakda, olaryň döwür bilen arabaglanyşygyny berkitmekde aýratyn ähmiýete eýedir.

Akdepe etrap zenanlar guramasynyň guramagynda geçirilen bäsleşigiň bu tapgyryna gatnaşan zenanlar bellenen şertlere laýyklykda, Berkarar döwletiň täze eýýamynyň Galkynyşy döwründe el hünärini dikeltmekde we kämilleşdirmekde, ýaş nesli halal zähmete ygrarly, Watana wepaly edip terbiýelemekde, gujurly hem tutanýerli zähmeti bilen ýokary guramaçylyk ukybynyň, harby we hukuk goraýjy ulgamda işjeňligiň belent nusgasyny görkezmekde başarnyklaryny açyp görkezdiler.

Bäsleşik turuwbaşdan baý mazmunlylygy bilen tapawutlandy. Zenanlar bagtyýar döwrümizde özleri hakda edilýän aladalara zähmetsöýerligiň, işjeňligiň döwrebap nusgasyny görkezmek bilen jogap berýändiklerini çeper sözler bilen beýan etdiler.

Şeýle mazmundaky bäsleşik welaýatyň Boldumsaz, Köneürgenç,  Saparmyrat Türkmenbaşy, Görogly, Şabat etraplarynda-da ýokary guramaçylyk derejesinde geçirildi. Bäsleşikde ýeňiji bolan zenanlar onuň welaýat tapgyryna gatnaşmaga hukuk gazandylar.

Ýeňijilere we bäsleşige gatnaşyjylara TKA-nyň etrap birleşmeleriniň sowgatlary dabaraly ýagdaýda gowşuryldy. Etrap medeniýet merkezleriniň aýdymçy-sazandalarynyň çykyşlary bäsleşige gatnaşyjylara ruhy lezzet paýlady.