Köňülleriň çyragy sen, Pyragy!

«Pähim-paýhas ummany Magtymguly Pyragy» ýylynyň şanly dabaralary Daşoguz welaýatynda hem giň gerimde dowam edýär. Akyldar şahyrymyzyň doglan gününiň 300 ýyllygy mynasybetli guralýan şeýle çäreleriň biri Daşoguz şäherindäki Magtymguly meýdançasynda ýaýbaňlandyryldy.

«Magtymguly Pyragy — berkararlyk şygary» atly aýdym-sazly dabara welaýat häkimliginiň, welaýat Medeniýet, Baş bilim müdirlikleriniň bilelikde guramagynda geçirildi. Dabaranyň dowamynda Daşoguz şäher medeniýet merkeziniň aýdymçylarynyň, Magtymguly Garlyýew adyndaky ýörite sungat mekdebiniň talyplarynyň ýerine ýetiren, akyldar şahyrymyzyň şanyna döredilen aýdym-sazlary bilen utgaşdy. Welaýat Medeniýet müdirliginiň «Dostluk çemeni» tans toparynyň ýerine ýetiren joşgunly tanslary has-da täsirli boldy.