Kadalary berjaý etmek möhümdir

Ýurdumyzda mekdep okuwçylarynyň tomusky dynç alyş döwründe göwnejaý dynç almaklaryny guramak maksady bilen geçirilýän wagyz-nesihat çärelerinde suwa düşülýän ýerlerde howpsuzlyk düzgünlerini berjaý etmek barada aýratyn bellenip geçilýär.

Howanyň yssy günlerinde çagalar suwa düşüp, wagtlaryny şadyýan geçirmäge çalyşýarlar. Olara suwa düşülende berjaý edilmeli howpsuzlyk düzgünleriniň bardygyny-da ýatlatmak her birimiziň borjumyzdyr. Suwa ýörite bellenen, rugsat berlen ýapgyt kenarly, çägesöw ýerlerde düşülmegi amatlydyr. Suwa düşülmezinden öň gowy ýüzüp bilýänleriň biri düşüljek ýeriň — suwuň aşagyny oňat barlap, ol ýerde daş, aýna bölekleriniň, agaç kötükleriniň we beýleki howply zatlaryň ýokdugyny gözden geçirmeli, kenarlardan, köprülerden suwa bökmegiň howpludygyny düşündirmeli.

Nätanyş, öň barlanylmadyk ýerlerde suwa düşmäge topar-topar bolup gelýän çagalar özleriniň topar ýolbaşçysynyň görkezmegi bilen belli, rugsat berlen ýeri saýlap alýarlar. Şonda ýolbaşçy olara kenarlardan daşa ýüzmezligi, biri-birlerini gözden salmazlygy, akymyň garşysyna ýüzmezligi tabşyrmaly, suwa uzak wagtlap düşmegiň kada laýyk gelmeýändigini düşündirmeli. Şeýle edilende, betbagtçylykly hadysalar ýüze çykmaz we howply ýagdaýlaryň öňi alnar.

Dynç alşyň howpsuz, hadysasyz geçmegi hemmeler, aýratynam, ene-atalar üçin zerur bolup durýar. Şonuň üçin bu babatda bellenen kadalary berk berjaý etmek her birimiziň borjumyzdyr.