Jogapkärli möwsüme taýýarlyk

Daşoguz welaýatynyň gallaçy kärendeçileriniň köp zähmet siňdirip ýetişdiren bereketli hasylynyň ýitgisiz ýygnalyp, Watan harmanyna goşuljak günleri ýakynlaşýar. Şunuň bilen baglylykda, bu möwsüme ykjam taýýarlyk görmek esasy talaplaryň biri bolup durýar. Muny nazara almak bilen, şu günlerde welaýatyň ähli künjeklerinde bu ugurdaky işler gyzgalaňly dowam etdirilýär.

Belli bolşy ýaly, «Pähim-paýhas ummany Magtymguly Pyragy» ýylynyň galla oragy möwsüminde welaýat boýunça 145 müň gektar meýdandan 265 müň tonna ýokary hilli bugdaý ýygnap, döwlet harmanyna tabşyrmak wezipesi öňde durýar. Munuň özi ähli gallaçy daýhanlar bilen bir hatarda olara ýardam berýän edara-kärhanalaryň, önümçilik birleşikleriniň işgärlerinden hem uly jogapkärçiligi, sazlaşykly işleri, ýadawsyz tagallalary talap edýär.

Galla oragynyň çalt depginlerde, öndürijilikli alnyp barylmagynyň, esasan, oňa gatnaşdyrylýan kombaýnlaryň, ulaglaryň saz we bökdençsiz hereket etmegi bilen baglanyşyklydygy hemmelere mälimdir. Şoňa görä-de, welaýatyň «Obahyzmat» önümçilik birleşiginiň ýerlerdäki düzümlerinde, şeýle hem ulag kärhanalarynda bu ugurdaky taýýarlyk işlerine bellenilen möhletlerde girişilip, möwsümde ulanylmagy göz öňünde tutulan tehnikalar gözden geçirilip, kemçilikleri düzedilip, doly taýýar edildi. Mundan başga-da, olaryň iş üstünde ýangyç, tehniki hyzmat üpjünçiligi baradaky meseleleriň çözülmegine aýratyn üns berildi. Şonda kombaýnlaryň, ulaglaryň tejribeli adamlara berkidilmegi barada hem alada edildi.

Elbetde, bugdaý oragynyň guramaçylykly geçirilmeginde ýygnalyp, harmana getirilen hasylyň bökdençsiz kabul edilmeginiň hem möhüm ähmiýeti bar. Häzire çenli «Daşoguzgallaönümleri» önümçilik birleşiginiň ýerlerdäki galla kabul ediş bölümlerinde bu babatda zerur çäreler durmuşa geçirildi. Şonuň netijesinde ölçeg enjamlary, galla saklanyljak elewatorlar, harman jaýlary möwsüme doly taýýarlanyldy. Şeýle hem olar tejribeli hünärmenler, kömekçi gözegçiler bilen üpjün edildi.

Häzirki wagtda welaýatyň degişli edaralary, gulluklary tarapyndan kombaýnçylaryň, ulag sürüjileriniň arasynda möwsümiň dowamynda ýangyn-tehniki howpsuzlygynyň, ýol hereketiniň düzgünleriniň berk berjaý edilmegine gönükdirilen düşündiriş işleri, okuw-maslahatlar geçirilýär.

Umuman, welaýatyň gallaçylarynyň şu ýylyň galla oragy möwsüminde has-da belent sepgitlere eýe bolup, hormatly Prezidentimiziň bildirýän uly ynamyny ödemekleri, özleriniň saldamly bugdaý harmanlary bilen halkymyzy begendirmekleri, şeýlelikde, ata Watanymyzyň hemmetaraplaýyn gülläp ösüşlerine mynasyp goşant goşmaklary üçin ähli şertler döredilýär. Munuň özi olaryň uzak wagtyň dowamynda çeken agzybirlikli zähmetiniň ýerine düşjekdigini alamatlandyrýar.