Işleriň depgini ýokary

Halkara parahatçylyk we ynanyşmak ýylynda 18 müň gektar meýdanda pagtanyň bol hasylyny kemala getirmegi maksat edinen Daşoguz welaýatynyň Köneürgenç etrabynyň kärendeçi daýhanlarydyr ýer eýeleri gowaça ekişine irki möhletlerde girişmek bilen, bu möhüm çäräniň depginini günsaýyn ýokarlandyrmak ugrunda ähli mümkinçiliklerden netijeli peýdalanýarlar. Etrabyň «Pagtaçy» daýhan birleşiginde şu möwsümde 1300 gektar meýdana gowaça ekmek meýilleşdirilýär. Birleşigiň kärendeçi daýhanlary ýerleri öz wagtynda sürüp, tekizläp, suwdan oňat gandyrdylar. Bu çäreleriň Atamyrat Saryýew, Gurbangeldi Gazakbaýew, Allamyrat Arazmedow dagynyň ýolbaşçylygyndaky 2,5,9-njy kärendeçiler toparlarynda has-da guramaçylykly, ýokary hilli geçirilendigini bellemek bolar. Munuň özi daýhan birleşiginde gowaça ekişine öňdäkileriň hatarynda girişmäge mümkinçilik berdi. Şeýlelikde, häzirki günlerde hojalykda bu möhüm çäräniň depgini barha ýokarlanýar.