«Iň eýjejik gyzjagaz — 2025»

Döwranly döwrüň gül-gunçalary

Türkmenistanyň Magtymguly adyndaky Ýaşlar guramasynyň Merkezi geňeşiniň hem-de Bilim ministrliginiň bilelikde umumybilim berýän orta mekdepleriň 2 — 4-nji synplarynda okaýan okuwçy gyzjagazlaryň arasynda yglan eden «Iň eýjejik gyzjagaz» atly şadyýan bäsleşiginiň Daşoguz welaýat tapgyry geçirildi.Welaýatyň  Şabat etrabynyň Altynýol geňeşliginiň oba medeniýet öýünde geçirilen bäsleşigiň bu tapgyryna eýjejik gyzjagazlaryň uly topary gatnaşdy. Olar çaga dünýäsine kybapdaş görnüşde bezelen owadan sahnada özleriniň ukyp-başarnyklaryny görkezdiler. Bäsleşigiň bellenen şertlerine laýyklykda, gyzjagazlar belent owazly aýdymlary ýerine ýetirdiler. Ajaýyp aýdymlarda bagtly çagalygyň, dost-doganlygyň, parahatçylygyň we sagdyn durmuşyň waspy belentden ýaňlandy. Milli egin-eşikleri geýnip, olary şahyrana wasp edýän gyzjagazlaryň bagtyýarlygy buýsanja dolup, degre-daşy gurşap aldy. Milli el işlerine erjellik bilen ýapyşyşlary olaryň hünäre höwesini hem hormatyny, halypa-şägirtlik mekdebini geçýändigini, eje bilen gyzjagazyň özara gatnaşygyny, hünäre kämilligini doly açyp görkezdi. Bäsleşik örän gyzgalaňly, şol bir wagtyň özünde baý many-mazmunly geçdi. Has erjel çykyş eden gyzjagazlar ýeňişli orunlara mynasyp boldular we şu bäsleşigiň döwlet tapgyryna gatnaşmaga hukuk gazandylar. Bäsleşigiň ýeňijilerine we oňa gatnaşanlara TMÝG-niň Daşoguz welaýat geňeşiniň, Daşoguz welaýat Baş bilim müdirliginiň Hormat hatlary we ýadygärlik sowgatlary gowşuryldy.