Howpsuzlyk düzgünleri berjaý edilmelidir

Şu günler howanyň aşa gyzmagy bilen baglylykda, Daşoguz welaýat Polisiýa müdirliginiň ýangyn howpsuzlygy bölümi ýaşaýyş jaýlarynda, iş ýerlerinde elektrik-gaz enjamlaryny talabalaýyk gurnamaga, ulanmaga we ýangyn howpsuzlyk düzgünlerini berjaý etmäge çagyryp, şulary ýatladýar.

Ýaşaýyş jaýlarynyň, ulaghanalaryň daş-töweregi arassalanylyp, zir-zibiller öz wagtynda çäkden çykarylmalydyr. Geçelgeleri, girelgeleri, howlynyň içini, jaýlaryň ýangyna garşy araçäklerini, daşarky halas ediş merdiwanlaryny, ýangyna garşy suw howuzlaryna barylýan ýollary dürli goşlar bilen baglamak, jaýlaryň üçeklerine ýanyjy agaç gyryndylary, sypaldyr beýleki basym tutaşýan materiallary düşemek, şeýle-de jaýlaryň üçeklerindedir ýerzeminlerinde ýanyjy hojalyk goşlaryny saklamak talabalaýyk däldir.

Elektrik tok geçirijilerini daşky örtügi zaýalanan görnüşde ulanmak, simleri sütünlere birikdirilende ýönekeý usulda sarap goýmak, elektrik geçirijileri, enjamlaryň goraýjylaryny näsaz ýagdaýda peýdalanmak, elektrik gyzdyryjy enjamlary aşagyna oda durnukly materiallary goýmazdan ulanmak howpludyr. Enjamlaryň iş ýagdaýlaryna yzygiderli gözegçiligi ýola goýulmaly, olaryň birikdiriji öýjükleriniň berk gysylyp durmagy üpjün edilmeli, enjamlaryň elektrik geçirijilerinde näsazlyklar dörän ýagdaýynda awtomatiki ýagdaýda öçmegini üpjün edýän goraýjylar oturdylmaly.

Häzirki döwürde tehniki tilsimatlaryň ösmegi bilen, dürli görnüşdäki elektrik enjamlary öý hojalygynda giňden ulanylýar. Şolaryň içinde has-da köp ulanylýanlarynyň biri otag sowadyjylarydyr. Otag sowadyjylarynyň köpçülikleýin gurnalyp, bir wagtda işledilmegi ýangynyň ýüze çykmagyna uly şert döredip biler. Otag sowadyjylary ulanylanda ýangynyň döremegine ýardam beriji şertler enjamyň uzak wagtlaýyn işledilmegi, şol sanda adamlaryň enjamlary gözegçiliksiz galdyrmagy bilen baglydyr.

Toparlaýyn sowadyjylary energiýa bilen üpjün edýän elektrik geçirijilerde goragyň bardygyna garamazdan, olaryň hersi aýratynlykda, özbaşdak elektrik gorag tilsimaty bilen üpjün edilmelidir. Sowadyjylar beýiklikde oturdylanda, dolandyryş pultuna barmasy kyn bolsa, onda elektrik geçirijisinde hökman öçüriji goýmaly. Sowadyjynyň elektrik geçirijisini silkip, çekip aýryp öçürmek gadagandyr.

Tebigatyň gözel ýerlerinde, tokaý seýilgählerinde, öri-sähra meýdanlarynda açyk ot ýakmak, çilim çekmek, söndürilmedik otluçöpi taşlamak, uçgun berijileri ulanmak, çüýşe gaplaryny, aýna böleklerini we zir-zibilleri taşlap gitmek, çagalary gözegçiliksiz galdyryp, ot oýnamaklaryna ýol bermek, awtoulaglary ot-çöpli meýdanlara salmak, şol ýerlerde awtoulaglara tehniki hyzmatlary geçirmek gadagan edilýär.

Mähriban ildeşler! Ýangyny gören ýa-da duýan wagtyňyz, howsala düşmän öý-iş telefonlaryndan 01, öýjükli, ykjam el telefonlaryndan 001 belgä jaň edip, habar beriň!