Hemişelik Bitaraplygyň buýsanjy

Daşoguz şäher häkimliginiň, Türkmenistanyň Demokratik partiýasynyň şäher komitetiniň, şäher medeniýet merkeziniň hemde Gurbansoltan eje adyndaky Daşoguz lukmançylyk orta okuw mekdebiniň bilelikde guramagynda «Hemişelik Bitaraplyk — parahatçylygyň ösüşli ýoly» atly aýdym-sazly dabaraly maslahat geçirildi. Şäher häkimliginiň mejlisler zalynda geçirilen maslahata TDP-niň işjeň agzalary, lukmançylyk okuw mekdebiniň mugallymlary we talyp ýaşlary gatnaşdylar.

Dabarada çykyş edenler ýurdumyzyň halkara gatnaşyklar ulgamynda täze sepgitlere ýetýändigi dogrusynda bellediler. Hemişelik Bitarap ýurdumyzyň bu gün dünýäniň abraýly guramasy bolan Birleşen Milletler Guramasynyň geňeşleriniň, komitetleriniň, komissiýalarynyň birnäçesiniň agzasy bolup, degişli işleri amala aşyrýandygy, Diýarymyzyň dost-doganlygyň mekanyna, parahatçylyk dörediji merkeze öwrülýändigi dogrusynda aýdyp geçdiler. Şeýle-de dabaranyň dowamynda talyplaryň aýdym-sazly çykyşlary dabara gatnaşyjylara ruhy lezzet paýlady.