«Hemedan daş bolsa...»

Halkymyzda «Hemedan daş bolsa, kädi ýakyn» diýlen nakyl bar. Aýdyşlaryna görä, öňde bir adam Eýrana sapara gidipdir. Ol bu ýurduň köp ýerlerini gezip gelensoň, gören-eşiden zatlary hakda obadaşlaryna gürrüň berip öwünýärmiş.

Şonda Hemedan şäherinde gören geň-enaýy zatlaryny gürrüň berýärkä, kellesi gyzyp: «Hemedanda şeýle bir uly kädilere duşdum. Men şolaryň kyrkysyny dagy göteräýdim» diýip öwnüpdir.

Obadaşlary: «Heý, kyrk kädinem göterip bolarmy?» diýip, oňa ynanmajak bolsalar-da ol hem hiç ýeň bermändir.

Ahyry bu gürrüňleri diňläp oturanlaryň biri: «Hemedan daş bolsa, kädi ýakyn! Han-ha, hol kädilerden göter-de görkezäý!» diýipdir.

Şondan soň ýaňky öwünjeň jahankeşde kişi näme diýjegini bilmän, sözüniň soňuny haňk-huňka uraýypdyr. Şodur-da şodur, biriniň aýdýan zadynyň dogrudygyna müňkür bolup, ony anyklajak bolsalar: «Hemedan daş bolsa, kädi ýakyn! Ony barlap göräýeris!» diýýändirler. Ýöne bu nakylyň başga-da bir manysynyň bardygy köplere mälimdir. Onda nakyldaky «kädi» sözi «kärdi» bolmaly diýilýär, kärdi bolsa suwly ýaby aňladýar. Şonuň üçin bu nakyla «Köpri daş bolsa-da, suwly ýapdan böküp geçmegiň ýakyn» diýlip düşünilýär.