Hasabat-saýlaw ýygnaklaryna bagyşlandy

Belli bolşy ýaly, Türkmenistanyň Kärdeşler arkalaşyklarynyň Milli Merkeziniň kararyna laýyklykda, şu ýylyň ýanwar-fewral aýlarynda kärdeşler arkalaşyklarynyň ilkinji guramalarynyň hasabat-saýlaw ýygnaklary geçirilýär. Golaýda TKA-nyň Daşoguz welaýat birleşmesi bu möhüm çäräniň welaýatyň edara-kärhanalarynda hereket edýän KA-nyň ilkinji guramalarynda geçirilişine bagyşlanan okuw maslahatyny gurady.

Okuw maslahatynda TKA-nyň Daşoguz welaýat birleşmesiniň pudaklar boýunça utgaşdyryjysy Mämmetdurdy Muhammedow, guramaçylyk we medeni-köpçülik işler bölüminiň esasy hünärmeni Güljemal Nazarowa, Daşoguz şäher hassahanasynyň KA-nyň ilkinji guramasynyň başlygy Allaberdi Sarykow, agrosenagat işgärleriniň KA-nyň Daşoguz şäher geňeşiniň başlygy Gülruh Haljanowa we beýlekiler çykyş edip, welaýatyň pudaklarynda, edara-kärhanalarynda hereket edýän KA-nyň ilkinji guramalarynda hasabat-saýlaw ýygnaklarynyň barşy, olaryň talabalaýyk geçirilmegi üçin zerur bolan şertler, peýdalanylmaly gollanmalar hakynda gürrüň berdiler. Çykyşlardan görnüşi ýaly, ýurdumyzyň ykdysadyýetiniň ähli pudaklarynyň ösüşinde KA-nyň ilkinji guramalarynyň saldamly goşandy bar. Hormatly Prezidentimiz olara uly ynam bildirip, öňlerinde möhüm wezipeleri goýýar. Şonuň üçin hem her bir guramanyň öz işini ýokary derejede alyp barmagy esasy talap bolup durýar. Hasabat-saýlaw ýygnaklarynyň guramaçylykly geçirilmegi hem şeýle derwaýys işleriň biridir.