Halypa tüýdükçi bilen duşuşyk

Daşoguz welaýatynyň Daşoguz şäheriniň bagşylar muzeýinde 94 ýaşy arka atan halypa tüýdükçi, sazanda hem-de tüýdük ussasy Bally Kadyrow bilen döredijilik duşuşygy geçirildi. Döredijilik duşuşygyna muzeýiň işgärleri gatnaşdylar. Duşuşykda halypa tüýdükçi özüniň ömür ýoly, tüýdük ýasamagyň usullary we bu saz guralyny çalmagy çopançylyk edýän wagtlary öwrenendigi barada gyzykly gürrüň berdi.

Halypa tüýdükçi gargy, dilli, goşa dilli tüýdükleri ýasamagyň ussady. Duşuşygyň dowamynda ol özüniň ýasan tüýdüklerinde birnäçe sazlary çalyp berdi. Halypa tüýdükçi diňe bir tüýdükde saz çalman, eýsem, dutarda hem türkmen halk sazlaryny ýerine ýetirýär. Şeýle-de halypa tüýdükçi özüniň ýasap getiren iki sany gargy tüýdügini, tüýdügiň täsin görnüşleriniň biri bolan goşa dilli tüýdügini hem-de özüniň çeper döredijiliginden dörän gamyşdan ýasalan Günüň şekilini muzeýe sowgat berdi.

Duşuşygyň dowamynda halypa tüýdükçi özüniň sylagly hünäriniň inçe syrlaryny, usul-tärlerini şägirtlerine irginsiz öwredýändigini aýtdy.