Halypa göreldesi — ýaşlara ýörelge

Berkarar döwletiň täze eýýamynyň Galkynyşy döwründe halkymyzyň saglygy, abadançylygy baradaky alada döwlet syýasatynyň ileri tutulýan ugurlarynyň birine öwrüldi. Ýurdumyzda saglygy goraýyş ulgamynda durmuşa geçirilýän düýpli özgertmeler muňa aýdyň şaýatdyr.

Ýakynda Daşoguz welaýatynyň Akdepe etrabynyň Andalyp şäher hassahanasyna lukmançylyk orta okuw mekdeplerini tamamlan ýaş hünärmenleriň birnäçesi işe geldi. Hassahanada işe başlan ýaş hünärmenler işleýän ugurlary boýunça köp ýyllardan bäri asylly zähmeti bilen halkyň arasynda tanalýan Zulaýha Mätýakubowa, Maýa Guzyçyýewa, Rozumbaý Rejepow, Annamämet Saparow ýaly halypa lukmanlara berkidildi.

Garaşsyz, hemişelik Bitarap Türkmenistan bütin dünýäde ynsan saglygyny ähli zatdan belentde tutýan döwlet hökmünde tanalýar. Şoňa görä-de, saglyk ulgamynyň işgärleri her bir maşgalanyň saglygyny goramakda, keselleriň öňüni almakda döredilip berilýän giň mümkinçiliklerden peýdalanyp we ruhlanyp, her bir ynsanyň bagtyýarlygyny, saglygyny goramak ugrunda ýadawsyz zähmet çekýärler.