Halkara olimpiadanyň ýeňijileri

Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň üç ýyllygy mynasybetli, Arkadag şäherindäki Aba Annaýew adyndaky Halkara atçylyk akademiýasynda bu gaznanyň howandarlygynda guralan mekdep okuwçylarynyň halkara matematika olimpiadasy geçirildi.

Olimpiadanyň dowamynda ýeňijiler kesgitlenilip, olaryň hatarynda Daşoguz welaýatyndan hem Daşoguz şäherindäki daşary ýurt dillerine ýöriteleşdirilen 26-njy orta mekdebiň okuwçysy Begenç Gummanowyň 1-nji orna mynasyp bolup, altyn medal gazanandygyny uly buýsanç bilen bellemek gerek. Şeýle hem bu olimpiadada şäherdäki 24-nji orta mekdebiň okuwçysy Süleýman Koçkarow, 26-njy orta mekdebiň okuwçylary Rahymberdi Döwletmyradow, Arman Ahmedow 2-nji orny eýeläp, kümüş medala, 24-nji orta mekdebiň okuwçysy Mahkambek Hudaýarow, 26-njy orta mekdebiň okuwçysy Bahar Niýazmetowa dagy 3-nji orny eýeläp, bürünç medala mynasyp boldular. Bu gazanylan guwandyryjy netijeler berkarar döwletimizde amala aşyrylýan bilim özgertmeleriniň rowaçlyklara beslenýändiginiň aýdyň nyşanydyr.