Gyrgunan

Ýellerden ýüwrüksiň, hyýaldan ýyndam,

Taýyň bolmaz, bäs edere Gyrgunan.

Taryhyň gadymy, tarypyň aýdym,

Doldy çawyň bu illere, Gyrgunan.

Uly-uly aýlawlary baglarsyň,

Ýeňiş bilen göwünleri çaglarsyň,

Atoglanyň ýigit göwnün awlarsyň,

Aýlaw saňa şan-dereje, Gyrgunan.

Çapanyňda dartyp ýeriň tanapyn,

Hakla bu gün ussat seýsiň azabyn,

Soňra diňle şahyryň bu gazalyn,

Tarypyň bar wasp edere, Gyrgunan.

Aýak urşuň jilwemidir, näzmidir,

Tutuş durkuň bir ajaýyp sazmydyr,

Atlansam gerşiňe, göwnüm ýazmydyr,

Seleň sähra seýil edeli, Gyrgunan.

Aýlawlarda alanyňda baýragy,

Seýsiň hem Arşa galýar abraýy,

Görküň bilen beze toýdur baýramy,

At agnasa — toý-dabara, Gyrgunan.