«Guşy gonanda tut!»

Halk arasynda akyldar şahyrymyz Magtymguly Pyragynyň öwüt-nesihat häsiýetli goşgularyndan hiç bolmanda bir şygryny, bendini ýa-da setirini bilmeýän ýok bolsa gerek. Onuň şygyrlary ynsanperwerligi, ahlaklylygy wagyz edip, setirleri nakyla öwrülip dilden-dile geçip gelýär. Beýik akyldaryň her şygrynyň döreýşi barada rowaýatlar ýörgünli. Onuň «Dilberiň» atly goşgusynyň döreýşi barada şeýleräk rowaýat bar.

Şahyryň ussahanasy adamsyz bolmaz eken. Kimsi ýüzük, kimsi bedew atyna göwüsbent, eýer, gamçy oňardar eken. Bir gün bir gelin ussadyňka gülýakasyna gaş goýdurmaga gelipdir. Magtymguly onuň gülýakasyna gaş oturtmaga başlapdyr. Ol birden gülýakany goýup, ýanyndaky döwet galamy alyp, bir zatlar ýazmaga başlapdyr. Bu zatlary synlap oturan gelin:

— Şahyr aga, nämä gyssandyňyz? — diýip sorapdyr. Onda Magtymguly:

— Keýgim, bu bir uçup ýören guşdur. Ony gonanda tutmasaň, uçar gider, gülýakaň welin hiç ýere gitmez — diýipdir. Gelin:

— Ol nähili guş bolýar, şahyr aga? Görünýän zat ýok-la?! — diýipdir.

Magtymguly gelniň sowalyna anyk jogap bermän dymypdyr. Şonda Magtymguly Pyragynyň «tutan guşy» «Dilberiň» diýen goşgusy eken.