Gurmak, döretmek ýoly bilen

Gurmak, döretmek ýoly bilen

Şeýle şygar bilen TKA-nyň Daşoguz welaýat birleşmesiniň, TSTP-niň Daşoguz welaýat komitetiniň bilelikde guramagynda dabaraly maslahat geçirildi. Ýurdumyzda giňden bellenilýän Gurluşyk we senagat işgärleriniň güni mynasybetli guralan maslahata agzalan ulgamlarda zähmet çekýän öňdebaryjy hünärmenler gatnaşdylar.

TKA-nyň Daşoguz welaýat birleşmesiniň uly mejlisler jaýynda geçirilen maslahatda çykyş edenler ýurdumyzda «Pähim-paýhas ummany Magtymguly Pyragy» ýylynda Gurluşyk we senagat işgärleriniň gününiň dabaraly bellenilýändigini buýsanç bilen nygtadylar. Häzirki wagtda ýurdumyzda hormatly Prezidentimiziň baştutanlygynda medeni-durmuş maksatly birnäçe binadyr desgalaryň, ýaşaýyş jaýlarynyň gurluşygynyň güýçli depginde alnyp barylýandygyny aýtdylar. Şeýle hem çykyşlarda senagat pudagynda dürli taslamalaryň üstünlikli durmuşa geçirilmeginiň milli ykdysadyýetimiziň ösüşinde onuň paýynyň barha ýokarlanmagyna ýardam edýändigi aýdyldy.

Maslahatyň dowamynda göreldeli zähmet çekýän gurluşyk we senagat pudagynyň öňdebaryjy hünärmenlerine TKA-nyň welaýat birleşmesi tarapyndan sowgatlar dabaraly ýagdaýda gowşuryldy.