Gowaça ekişine taýýarlyk

Berkarar döwletiň täze eýýamynyň Galkynyşy döwründe beýleki pudaklaryň hatarynda oba hojalygyny ösdürmek, ene toprakdan bereketli hasyl öndürip, azyk howpsuzlygyny üpjün etmek boýunça möhüm wezipeler öňde goýlup, bu babatda alnyp barylýan işlere uly goldaw berilýär. Ondan ruhlanyp, 2025-nji — Halkara parahatçylyk we ynanyşmak ýylynda 17,5 müň gektar meýdanda bol pagta hasylyny ýetişdirmek ugrunda Daşoguz welaýatynyň Görogly etrabynyň daýhan birleşiklerinde, degişli edara-kärhanalarynda amala aşyrylýan çäreleriň depgini-de artýar. Şonda golaýlap gelýän ýaz ekişinde etrap «Obahyzmat» önümçilik kärhanasynyň hasabyndaky dürli kysymly traktorlaryň 100-e golaýyny, gowaça ekijileriň 45-sini, boronalaryň 1535-sini, malalaryň 149-syny, çizelleriň 29-syny ulanmak göz öňünde tutulyp, olary birlaý gözden geçirmek, abatlamak boýunça işleriň tamamlaýjy tapgyrda alnyp barylýandygyny bellemek bolar. Bu işde kärhananyň ezber ussalarynyň, mehanizatorlarynyň onlarçasy yhlasly zähmet çekýärler. Şeýlelikde, şol tehnikalaryň, olaryň iş gurallarynyň esasy bölegi gowaça ekişine doly taýýar edildi.